Tristan hag Izold, Zavier Langleiz (1958)

Deuet eo brav gant Langleiz istor Tristan hag Izold, diazezet war ar vojenn hollvrudet, dispac’hus daoust d’al lañsoù relijiel a glask digareziñ stad kablus an daou garedig. Kempouezet en deus brav e bennadoù en ur renkañ enno a bep eil dilammadennoù ha predoù sioul a garantez eeun. Gouezet en deus chom eleveziek pa eztaol santimantoù e dudennoù : herezh arz ar varzhed predenek kent ? Me gav din e chom diouzh ar c’hiz ar romant ken dre e dem ha dre e skritur. Ur c’hlasel, da virout e levraoueg an ti da vout lennet gant an holl d’ur mare bennak. Tresadennoù brav a ginkl al levr ouzhpenn : graet int bet gant Langleiz e-unan.