N’eo ket didalvoud lenn al levr gant ar pinvidik m’eo geriaoueg ha brezhoneg Erwan Evenou dre vras, ha war kement live yezh a zo. Ar pep bourrusañ eo moarvat lenn brezhoneg pemdez, pe laosk zoken, evel ar galleg a c’hellomp kaozeal war ar pemdez : ar pezh a vank d’ar vrezhonegerien “arnevez”, sur. Gall a reer bezañ beuzet e-barzh kement a ouiziegezh a-wezhioù betek koll neudenn (dirollet) an darvoudoù : war ar c’hraf-se e welan ur gerentiaj bennak gant romantoù Favereau. Kalz a ijin en deus ar skrivagner ivez, o veskañ ar bed normal gant unan dreist-naturel kar-nes ouzh mojennoù ha barzhaz poblek Breizh.
Souezhet bras on bet gant doare an harozed : paotred nemetken (n’o deus ket ar merc’hed roloù brav e-barzh ar romant, met se zo boutin a-walc’h c’hoazh, allas). Peseurt paotred avat ! Kannerien, prim o klask renkañ an disterañ kudenn gant taolioù dorn, pe benn, pe benn-bazh, hervez ! Kalimanted, en ur ger ! Ma, perak pas… Seul lies seul binvidik…
Drein a zo er romant memestra, ha rouestlet mat zoken. Kavet em eus dizereat krenn e vije an enebour pennañ, an diaoul, evel ma vez skrivet meur a wezh gant an oberer, war un dro heñvelreviad hag arab, an daou berzh “fall”-se o vezañ deskrivet gant gerioù dizouj ha faeüs war ma meno. (N’eus ket heñvelreviaded allen istor, nemet ar re zispis zo o treiñ tro-dro d’an hini drouk, ha den ebet all ne vije ket gwenn e groc’hen). Lakaet on bet diaes ouzhpenn ur wezh o soñjal e c’helle bezañ bet implijet eñvorennoù ratonadoù pe abadennoù ken dudius all evit reiñ pebr da senennoù ‘zo. Souezhet bras on e c’hellfe bezañ embannet seurt mennozhioù gouennelour hag homofob a-boan skoachet en deiz a hiziv. Souezhet ivez o tizoloiñ an dra-se va-unan : daoust hag-eñ ne zlefe ket bezañ merzet pa vez skridvarnet ul levr ?? Merzout a ran avat eo bet embannet war anv an aozer, kontrol d’e romant kentañ : marteze n’eus ket fellet da di-embann ebet dougen kiriegezh an diabarzh ?
19/01/2009
Ebrel 3rd, 2009 at 20:16
Hopala tudoù! N’eus ken ‘met ur gouennelour e-barzh ma romant, ha n’emañ ket e gamaraded ali gantañ. Evit an Arab a zo sañset da c’hoari roll an Diaoul, berber eo e gwirionez, ha lod a lak anezhañ da Antilhad… Ha ne vez ket prouet ‘lec’h ebet e ve bet heñvelreviad, diouzh ma kav d’e enebour gwashañ, ‘vit doare. “N’oa ket em soñj sevel ma mouezh a-enep d’ur boblad, d’ur c’houchad tud, d’ur relijion” (pajenn 10 al levr).
ar skrivagner