Tag Archives: Harry

Harry Potter and the cursed child, J. K. Rowling, bro-Saoz (2016)

harry potter 8Souezhet e oan abalamour d’ar stumm dibabet gant J.K. Rowling evit an eizhvet levrenn-man. Kredin a raen ne vije ket ken efedus hag ur romant, e vankfe traoù, ne gavfen ket va c’hont. Komprenet em eus buan, en ur lenn, ne oa ket gwir : disonjet em boa e c’hoarvezfe an istor e lec’hioù mil anavezet ganin, hag e vije he zudennoù pennan mignoned a-gozh din… Ur poent evit ar stumm !

N’eo ket ul levrenn vihan bet embannet evit rein o gwalc’h da gumuniezh “fan” Pottermania avat. An eizhvet Harry Potter, ne lavaran ket. Nag a ebat, goude an holl vloavezhioù-se, o tizoloin unan nevez !

Kavet em eus fin an istor, enni lammoù en amzer gras d’un “distroer-amzer” evel an hini a implije Hermione en trede levrenn : gant se, ha daoust ma vije mab yaouank Harry, Albus Potter, e kreiz ar jeu, e c’heller adkejan ouzh lod eus an tudennoù orin, en o zouez re a varv diwezhatoc’h. N’an ket da spoilan muioc’h…

Kalz suspens zo e meur a lec’h, ha from ivez. Degaset eo d’ar sklêrijenn traoù kozh a oa chomet war galon an dud ivez.

Ar pezh em eus kavet skoüs, el levr-man, dreist pep tra, eo ar mailhoni a ziskouez J. K. Rowling war bsikologiezh he zudennoù. Tregernin a ra o zrivliadoù e kalon al lenner. Bez ez eus enno ur reizhded ral, a ro he friz d’an oberenn. Gouest eo bet, betek ar fin, da lakaat Harry, Ron, Hermione ha Draco da greskin en oad ha da zarevin.

Echu eo gant Harry Potter, emezi. Ne vo levr all ebet goude hennezh. Trist on, met breman m’em eus echuet anezhan, e komprenan ivez eo bet lavaret pep tra.

Trugarez J.K. Rowling, evit an hunvre brav-se en deus luskellet ac’hanon ken pell !

Spi em eus e vo tu da welet ar pezh-c’hoari e galleg un dezi bennak…

Advertisements

Naskiĝo de la rustimuna Ŝtalrato, Harry Harrison, Stadoù Unanet (1961)

naskigxo de la rustimuna sxtalratoDianv e oa din ar skrivagner skiant-faltazi-mañ, daoust ma vije brudet bras unan eus e oberennoù :  ar romant Make room! make room! oa bet tennet ar film Soylent Green dioutañ.
Ar romant-mañ n’eo ket eus ar memes rummad met eus hini The Stainless Steel Rat (Ar razh dir disvergl) a zo 11 romant oc’h ober anezhañ. Eus ar rummad-mañ n’eo bet lakaet nemet an div levrenn gentañ e galleg, ha nemet an hini kentañ en Esperanteg, din da c’houzout. Perak dibab treiñ anezhañ ? Dre ma harpe hardi Harry Harrison an Esperanteg, a ra anv anezhi er romant hag e romantoù all. En un impalaerezh galaktek doare Star Wars eo ar yezh komzet gant an holl evit an darempredoù etreplanedennek.

O soñjal e bannoù-treset e oan e penn kentañ al levr-mañ, o klask gouzout hag-eñ e oa kentoc’h evel Picsou pe evel buhez Joe Dalton. Heuliañ a reer ur paotr yaouank speredek-kenañ en deus lakaet en e benn dont da vezañ laer a-vicher. En em leuskel a ra da vezañ tapet evit bezañ kaset d’an toull-bac’h gant ar soñj deskiñ traoù diwar-benn e gendorfedourien. Buan e tizolo n’eus nemet al laeron c’hwitet zo en em gavet en otel-se, achap a ra neuze ha mont e darempred gant La Kuriero, un torfedour ha n’eo ket bet tapet gant den ebet gwezh ebet : ne ouezer ket piv eo zoken. Nac’h a ra hennezh labourat gantañ pe stummañ anezhañ da gentañ, met a-raok pell en deus ezhomm sikour ha ret e vo dezhañ asantiñ kenlabourat ha treuzkas e stil hag e filozofiezh.

Souezhus a-walc’h em eus kavet an ton ha n’eo ket gwall sirius, ar pezh a roe din ar santimant da goll va amzer tamm-pe-damm o lenn ul levr evit bugale er penn kentañ. Evel Tintin hag ur bern harozed brudet all, Jim DeGriz hag ar C’huriero ne lazhont den ebet gwezh ebet. En em laosket on da vont gant red an istor koulskoude : c’hoarvezout a ra traoù diouzh an druilh ha paket e vez an haroz e gwallblegennoù alies. Harpañ a ra Harry Harrison war bedoù skiant-faltaziek e kit, bet krouet gant tud all (barrek-tre e oa war ar skiant-faltazi hag embannet en doa antologiezhioù diwar he fenn), met lakaat a ra e loaiad a ijin hag a virvidigezh enno d’o lakaat da dalvouzout ar boan. Kalzig fent zo en e skritur ha santet e vez ar blijadur en doa bet o skrivañ. Kontant e vijen da lenn peurrest ar rummad a-benn ar fin.


Harry Potter et la Philosophie : petit traité à l’usage des Moldus, David Baggett, Shawn Klein, William Irvin, Pascal Loubet, Stadoù Unanet (2006)

Harry_Potter_et_la_philosophieA bep seurt levrioù a gaver war sujed ar saga Harry Potter. Hennezh a brofit eus e vrud evit dielfennañ lod eus an danvezioù filozofel a c’heller tennañ dioutañ. N’on ket tik ouzh ar prederouriezh, a gavan start da gompren peurliesañ, met tremen a ra aesoc’h pa vez liammet ouzh ur romant a anavezan dre an eñvor gant al lies em eus lennet anezhañ !

N’em eus ket kavet gwallzedennus an holl demoù a zo anezho e-barzh, mont a ra decrescendo koulz lavaret gant ur penn kentañ kalz gwelloc’h eget ar fin (pe aesoc’h da gompren pa ne vezer ket arbennigour, moarvat). Ar pennad em eus kavet an dedennusañ zo diwar-benn Hermione gwregelourez : lavarout a ra ez eus ur barelezh dreistordinal e bed Harry Potter. Pe e vije paotr pe blac’h an dud, ne ra diforc’h ebet. Kavout a reer merc’hed gant n’eus forzh peseurt karg, uhel pe izel, hag e kampionad Quidditch ar bed zoken. Ne vez ket komzet eus kudennoù kevatalded etre paotred ha merc’hed, ar barelezh zo direbech. Dre se, n’en em sant ket lakaet a-gostez ar merc’hed a lenn al levr-se. Ken dedennus all eo ar pennad a c’houlenn hag-eñ eo moral ar fed ne daolfe pled den ebet ouzh strivoù Hermione da reiñ ur statud dereat d’an “elfes de maison”. E gwirionez, n’eo ket. Hag ar respont roet gant Ron : Plijet eo ar re-se gant o buhez, ne fell ket dezho cheñch statud, n’eo ket degemerabl kennebeut pa ouezer e c’helle sklaved du reiñ ar memes respont : dont a ra diwar un hir a wask. Pa z’eer pelloc’h en istor e weler e paeo tudennoù Harry Potter evit se : gant Kreattur e vo treitouret Sirius ha kaset d’ar marv ; ma ne vije ket bet laosket er stad truezus-se, ne vije ket en em droet war an tu fall marteze. Ur bern studiadennoù all a seurt-se a zo. Unan a ziskouez en devez aon Harry atav p’en em gav rak un dañjer bennak, met ne chom ket da dortal pa vez anv da saveteiñ unan bennak koulskoude, ober a ra ar pezh en deus d’ober, daoust d’e aon.

Dedennus-tre e oa, siwazh eo bet skrivet al levr-mañ a-raok fin ar saga ha ne gomz nemet diwar-benn ar pemp levrenn gentañ. Ar pennadoù zo bet skrivet holl gant tud sot gant ar rummad-levrioù-se ha dre se n’on ket sur e vije gwall skiantel an hent-preder, tuek forzh penaos. Met n’eo ket ur gwall afer evit unan a zo sot gant al levrioù-se dija !


La vérité sur l’affaire Harry Québert, Joël Dicker, bro-Suis (2012)

la-verite-sur-l-affaire-harry-quebert,M93686N’em bije ket divinet n’eo ket amerikan ar skrivagner. Ur romant amerikan eo… skrivet gant ur suisad. Amerikan eo an dezreveller, o vevañ er Stadoù-Unanet hag o reiñ ur bern titouroù, a-hed ar romant, diwar-benn sistem amerikan ar pezh a c’hellfer envel ar “gounidigezh pluennoù” : penaos e vez dizoloet, bountet, goroet, argaset ar skrivagnerien, betek lakaat o awen da vont da hesk.

N’eo ket arguzenn gentañ ar romant, daoust ma kemerfe ur plas bras. Ur skrivagner yaouank brudet gras d’e romant kentan eo an dezreveller. Sturiet eo bet war an hent-se gant e gelenner, mignon ha heñcher Harry Quebert, skrivagner ivez, deuet brud dezhañ abalamour da unan eus e romantoù dreist-holl. Met un istor polis glasel eo e gwirionez. Kregiñ a ra evel ur romant-polis, na mui, na maez. Dre ma ne gaven ket lijer ar bluenn ha boutin a-walc’h an itrik, e oan estonet e penn kentañ gant ar berz en doa graet ar romant : priz Goncourt al liseidi e 2012 ha darbet rasklañ ar Goncourt e-unan war-bouez un nebeut mouezhioù. En ur vont war-raok gant an itrik, en ur zizoloiñ tro-ha-tro meur a ziluziadenn a anzave bezañ holl hentoù dall, em eus kroget da vagañ istim ouzh ar romant ha dreist-holl ouzh an istor luziet-mat. Souezhadennoù bras em eus bet a-leizh, o deus kaset ac’hanon betek ar fin evel pa vijen douget gant ur gorventenn. N’eus netra plijusoc’h gant ur romant eget na c’hellout ket dispegañ dioutañ gant ar c’hoant gouzout !

N’on ket kendrec’het da vat gant ar refleksionoù profitabl a-ziwar ar vicher a skrivagner strewet paot gant ar mestr d’e ziskibl, met lod int eus un hollad ha n’hellfer ket diluziañ an enklask a-zoare hepto. Deuet eo a-benn Joël Dicker eus e daol. N’eo ket gwall gozh hennezh, ganet eo e 1985 : ur skrivagner da heuliañ moarvat.

 


Harry Potter 1, 2, 3, 4, 5, 6, 7 ; Joanne Kathleen Rowling, Bro-Saoz (1997-2007)

Harry1

Pa m’ bije un “épouvantard” da lakaat da dec’hout kuit e soñjfen en deiz m’em eus dizoloet Harry Potter. Tridus eo da vat. N’hellan ket kompren penaos e c’heller ijinañ bedoù ken diwirion ha ken gwirion war un dro. Ur voem eo. Un estlamm. Ur marzh.
harry2
Ar pep gwellañ eo e pad an huderezh pelloc’h eget al lennadenn gentañ, peogwir em eus bet kement a blijadur oc’h adlenn anezho holl e saozneg hag e oan d’an nebeutañ ken strobinellet.
Resis, deskrivet munut, pinvidik
harry3
Dav eo din anzav e lennan buan ar c’hrogadoù Quidditch a gavan hir un disterig alato.
harry4
Ne daolan ket nemeur a evezh ouzh an itrik ; kavout a ra din eo spontusoc’h c’hwi-oar-piv pa vez komzet diwar e benn eget pa vez sellet outañ tal-ouzh-tal ; ha ne vourran ket re ouzh an istorioù spont dre vras. Holl binvidigezh al levrioù-se, evidon, zo en en-dro, er bed he deus krouet J.K.Rowling, e familh Ron, e Poudlard, en tudennoù a eil renk…
harry5
Deuet eo a-benn da lakaat ar vugale da vrasaat a levrenn da levrenn gant gwirheñvelded, a gav din.
harry6
<n'on ket bet dipitet gant ar fin, kavet en deus din he doa raktreset mat pep tra ar skrivagnerez, ha souezhet brav on bet gant afer Rogue !

…Pa serran Harry Potter en em santan evel emzivadez !

harry7