L’élégance du hérisson, Muriel Barbery, Frañs (2006)

elegance herissonC’hoant ‘moa da lenn al levr-mañ abaoe ma oa bet embannet : peadra da gompren ne z’an ket ken buan ha ma karfen gant va lennadennoù. Ur pennad-skrid meuleudius em boa lennet diwar e benn en ul lec’h bennak ha sur e oan e plijfe din.

N’on ket bet dipitet tamm ebet !

Un dislavar anat zo, er romant-mañ, etre talvoudegezh ar sevenadur hag ar fed diskouez anezhi. Dezrevellet eo an destenn gant div dudenn wregel : porzhierez ur savadur chik ha cheuc’h eus Pariz, hag ur plac’h daouzek vloaz a zo o chom en unan eus ar ranndioù gant he familh. Renée ar borzhierez ne fell ket dezhi diskouez e mod ebet eo kizidik ouzh an arz. C’hoari a ra perzh ar borzhierez direbech a c’hortozer diganti, pa dremen hec’h amzer vak o redek al levraouegoù hag ar mirdioù evit arvestiñ ouzh oberennoù ar vistri war al livourezh hag o lenn kement lennegezh ha prederouriezh. He sekred eo. Paloma, ar plac’hig, donezonet-kaer ivez, he deus ar santimant eo ar vuhez a c’hortoz anezhi ur seurt stign ha ne zigor dazont dedennus ebet dirazi : gant se, e c’hoari tamm-pe-damm ar memes perzh hag hini ar borzhierez. Un trede komper a zeuio da lakaat ar c’hempouez da cheñch, darempredoù nevez a savo, ha dorioù o tigeriñ evit an holl.

An tudennoù livet gant Muriel Barbery, daoust ma kreder enno pa lenner he romant, n’int ket gwall wirheñvel : ur seurt fablenn eo a ro d’al lenner. Prederiadenn soutil war ster ar vuhez, ha muioc’h c’hoazh, war doare pep hini d’ober e doull enni, da gavout e blas dezhañ e-unan e lusk ar bed ha daoust da ardoù ar gevredigezh. Skrivet eo brav, gant spiswel, hag alies e tleer lenn meur a wezh ur frazenn saourus. E blas en deus ar fent ivez, ouzhpenn ur wezh.

Anzav a ran on bet dipitet gant diskoulm ar romant : bez em eus ar santimant e tro kein ar skrivagnerez d’ar jeu luziet he doa lakaet e plas en un doare re glasel. Daoust da se e chomer war ur santimant plijus ha yael, p’eo kouezhet an holl vaskloù.

Advertisements

About pevarlagad

Ul lennerez o reiñ deoc'h pezh he deus skrivet goude he lennadennoù e-pad bloavezhioù. Deoc'h da reiñ ho soñj ivez. Gwelout an holl notennoù gant pevarlagad

One response to “L’élégance du hérisson, Muriel Barbery, Frañs (2006)

Lezel ur respont

Fill in your details below or click an icon to log in:

Logo WordPress.com

Emaoc'h oc'h ober un evezhiadenn gant ho kont WordPress.com Log Out /  Kemmañ )

Google+ photo

Emaoc'h oc'h ober un evezhiadenn gant ho kont Google+ Log Out /  Kemmañ )

Skeudenn Twitter

Emaoc'h oc'h ober un evezhiadenn gant ho kont Twitter Log Out /  Kemmañ )

Luc'hskeudenn Facebook

Emaoc'h oc'h ober un evezhiadenn gant ho kont Facebook Log Out /  Kemmañ )

War gevreañ ouzh %s